對不起，我標題黨了，其實就是兩個中年臭男人，不過港圈就剩我們兩人，所以我們也真的是港圈最型最帥的那兩個 lol。這次也是Hive港圈最齊人的一次meet up，因為港圈就剩下我們兩個臭男人......其實還有幾位的，不過她們都已長居海外轉戰英文圈......所以我會把這次meet up理解為100%齊人聚會......既然是港圈，我今次就用港式粵語，睇你哋明唔明。

話說今次meet up嚟得都好突然下，本身我同Andrew都未見過面，我同佢加入既時期都唔同，我比較早2017年就開始寫，佢大約2020年先嚟，嗰陣時我已經唔係好活躍，基本直到around 21, 22年吧，我哋開始喺wechat有交流，到後來我就潛埋水變咗隱形人。其實今次我回歸都同佢有關係，係佢喺大約半年前wechat我叫我返嚟寫吓文，本身我都無理佢，不過一兩個月後我新工開始穩定，時間比以前又多咗，其實係有時間寫文的，所以我又走返嚟寫文了，一切都係因為我哋既西總，不過我都係叫你Andrew吧。

Meet up前一晚，我啱啱收到部Solana Seeker Phone，由於我都唔係好熟部機，就去咗We7群問下有無朋友都有買機，咁啱Andrew都有，佢就We7我傾咗兩嘴，傾傾吓到第二日就話不如見個面食個飯啦，如是者，我哋就即日約成咗港圈Meet up，呢啲就係效率 lol。

其實話Meet up就只係食個飯，我而家都好少出街都唔知香港有乜好食，佢就差唔多變埋深圳人更加唔熟香港，咁就求9其先約喺旺角等先啦。夜晚7點我哋都好準時到達，吹咗兩嘴就去咗郎豪坊睇吓有咩食。

<img src="https://images.ecency.com/DQmZP1ffKpuEoYvMWqd12jvorve8FcF5TshMzhKB6ZfTzcw/photo_6181308166831196932_y.jpg" alt="" />

<img src="https://images.ecency.com/DQmfAM4sLUHL7BrXzTx2EVzpQ1xtrsWPeHGN6DwY7FmqLre/photo_6181308166831196933_y.jpg" alt="" />

<img src="https://images.ecency.com/DQmeGyoZm9RS7zEWDwosWASvGomxzdMtD8uYvQdZBrgVCwp/photo_6181308166831196934_y.jpg" alt="" />

而家啲人成日話香港已死，金融遺址，死城一個，都唔係丫，旺角都仲係好熱鬧呀，所以大家真係唔好睇咁多小紅書哈哈。朗豪坊喺砵蘭街隔離，相信都係旺角最熱鬧既地方，附近更係一個出名既紅燈區，@davidke20 拉總你有無興趣，我可以帶你走個圈哈哈。雖然Andrew話就話唔記得晒香港啲路，但佢喺朗豪坊仲熟路過我囉，我本身諗住上4樓，但上到4樓我都唔知，仲要佢提我。

4樓係食區，有好多餐廳，不過大部份都係日本同越南野，咁啱佢先喺日本同越南出完trip，所以我哋就搵間唔係日本越南野，然後我哋就見到呢間野。

<img src="https://images.ecency.com/DQmU6BQEQiekSBapwZBHXGdNF5NcV5eRK3taM8CBkEACCnk/photo_6181308166831196935_y.jpg" alt="" />

<img src="https://images.ecency.com/DQmeT1P2AyowRuY3JNibM9WR4vuAw4qFwTpVEKnhSm89aqx/photo_6181308166831196936_y.jpg" alt="" />

<img src="https://images.ecency.com/DQmXEF3zuThiTPhEqfpPcYLiZekiD7t82LSctKdfyT4Tce5/photo_6181308166831196937_y.jpg" alt="" />

燈籠滷味，都好丫，食下港式嘢都唔錯，點知我哋一睇餐牌，我屌丫，台灣嘢嚟既，你個名叫得滷味仲唔撚係港式？點知係台灣嘢？我唔係話台灣嘢唔好，不過我真係估佢唔撚到係台灣嘢，不過台灣嘢都好選擇，照殺。

好耐無出嚟食嘢，真係好Q多人，成間餐廳坐滿晒人，我哋只能夠搭一張四人枱，我哋對住坐，咁就啱喇，佢影相影呢邊，我影相就影另一邊，唔會重覆。

<img src="https://images.ecency.com/DQmQ9bq6PHYkkBx8phy8EM19hVn4VHztYYiRnFgyF9Cb5ZW/photo_6181308166831196938_y.jpg" alt="" />

呢個時候當然要影返張合照交差，唔知你哋見過西裝look既西總未？

<img src="https://images.ecency.com/DQmRmbqnWn4SpkkRZdkRSdrFL5Z9vEPr3DhyzpaS9C1ecpb/photo_6181308166831196939_y.jpg" alt="" />

交完差都要食嘢架，咁唯有點菜啦，我哋兩個麻甩佬真係好求9其，見有二人套餐就點個二人套餐。話係二人套餐，其實就係兩個一人套餐加多個小食，我就點咗個豬肚烏冬，佢點咗乜我唔記得咗lol。

<img src="https://images.ecency.com/DQmc8qW74DvFfWgDJApZqSKiZhpNDmxwQiLtxCj2gVCX6ZR/photo_6181308166831196940_y.jpg" alt="" />

老老豆豆香港食嘢真係幾貴吓，你哋睇我呢個烏冬，其實份量真係唔多，加多杯荔枝紅茶，二個人加埋係$276，即係一人138港幣。本來我係唔覺得貴既，但係呢幾年上得大陸多，就開始覺得貴喇，可想而知香港人係幾有錢，仲有咁多人出嚟食嘢，我呢啲窮撚都係留喺屋企好喇。

食完嘢吹下水，傾吓Hive，傾吓幣，傾吓生活又傾吓工作，傾傾吓先知原來我哋同年出世，真係咁啱得咁橋，後來又傾到8年前既Steem，當年不知幾多香港人玩Steem，高峰期有過百人，只可惜大家都係現實，一到熊市加埋delegation無咗，大家都快手power down走人，有啲直頭默默失蹤，連剩低啲SP都唔要，到咗而家人走茶涼，就得返我哋兩條佬喺度。

一路吹到9點，大佬呢晚唔返深圳了，留喺香港訓，講真佢日日深港兩邊走都真係幾痛苦，我應該就做唔到喇。臨走屌多兩支煙，呢鋪真係壞過凱婷，之後就各自歸家。

@atyh 香港食嘢貴呀，下次我上嚟深圳玩啦。

P.S. 這篇是很正宗的港式粵語，不知你們看懂多少？